Elîşêr Koçgirî

Tayîb Erdogan di dozeke ku li hember wî hatiye vekirin de, bi sê qirûşan ceza girtiye. Tê wê wateyê ku nirxa wî ew qas bûye, dadgeh jî rasteqîn tevgeriyaye, jixwe zêdetir jî nedikir.

Erdogan ku wekî zilamê sê qirûş derbasî dîrokê bûye, li hemberî yên ku pênc qirûş nirxa wan heye ketiye rewşeke şermezariyê, ji ber vê yekê jî hêrs bûye. Ji zilamê pênc qirûş ên mîna Bûyûkanit, Bahçelî û Baykal re ev bûye moral.

Wax ji halê Tirkiya ku ji hêla zilamên sê-pênc qirûşî re tê birêvebirin. Ku cî hatiye ev rewş ji bona Bush’ê pênc dolarî jî derbasdar e. Kovboyê emperyalîzma Emerîkayê ew qas bênirx bûye ku, bi zilamên sê-pênc qirûşî re radibe rûdinê.

Her cara ku zilamên sê-pênc qirûş-dolarî tên cem hev, dest bi vegotina “PKK dijminê me yê hevbeş e” tê kirin û li hember PKK’êsonda têkoşînê didin.

Li hember van hemû nêrîn û daxuyaniyan, yên ku bifikirin helbet hene. Yên ku bi werîsên Emerîka xwe berdidin bîrê, ne pêwîst e ku mirov zêde tiştan bîne ziman. Bes ji bona ku yên bi navê emperyalîzma Emerîka dest bi gotinê dikin ev girîng e. Ji ber ku ew çiqas dij-emperyalîst in derdikeve holê.

Ji bona PKK pir tişt hatin gotin û xêzkirin. Encama ku derketiye holê, PKK li dij Emerîka di xeteke dij-emperyalîst de ye. Jixwe Emerîkî vê yekê aşkere aşkere tînin ziman.

Baş e, yên ku bi Emerîka re bi heman xetê de ne, ew jî derketine holê. Êdî hûn dibêjin nokerên Emerîka yan xulam, qewraş û tol an çi dibêjin bêjin, lê her tişt aşkere li holê ye.

Vaye zilamên sê-pênc qirûşî, daw û derpiyên serokên sê dolarî yên Emerîkî radimûsin. AKP’ya noker çiqas xweşik xwe dide dest. Kes nemaye ku nizane Sofî Fetûllah li Emerîka çi karî birêve dibe. Ev zilamê avasazê Tirk-Îslamê ye, vaye bi zilamên sê-pênc qirûşî ji Emerîka Tirkiyê birêve dibe.

Kemalîst jî, hê jî dev ji xwexapandinê bernedane. Ku ew bixwe zilamên sê-pênc qirûş nînbûna, ma wê bikaribûna ew li hev bikirana? Ya baş Emerîka kir, hem sê-pênc qirûşiya xwe bi dinyayê da nîşandan, hem jî li Rojhilata Navîn kî dijmin dibînin aşkere diyar kirin.

Ha ku cî hatiye, ku komploya navneteweyî nebûna, wê Emerîka ketina xwe ya Rojhilata Navîn di xewna xwe bidîtana. Tenê PKK’ye ku Emerîka di ketin û derketina Rojhilata Navîn de poşman bike. Ji ber vê yekê ye ku hemû nokerên Emerîka PKK’ê wekî dijminên hevbeş îlan dikin. Ka em dev vê berdin, ev Kurdistan e, erdnîgariyeke wisa ye ku fena ku bi te re biaxive. Ji te re hinek tiştan dibêje, hem jî çiqas xweşik vedibêje. Dibêje ku, min hezar salana ye ku dîtiye, kî hatin kî derbas bûn. Hêla min a berxwedêr, ji ber azweriya min a azadiyê ye. Ezê bi kevir, çiya û axa xwe derbasî berxwedaniyê bibim. Yên ku bi min jiyan kirine dizanin, wisa dizanin ku, li ser min destanên lehengiyê dinivîsin.
Vaye, ya ku ew zilamên sê-pênc qirûşî fêm nakin jî ev e. Heta ku dixwazin bila bêjin dijmin, bila bi dijminî êrîş bikin, ew Kurdistana ku ne têk diçe û ne jî bi dest dikeve, wê bi navê PKK’ê nivîsandina destanên lehengiyê bidomîne.

Ji me careke din gotin…