Piştî yekem êrîşa hewayî ya li dij Qadên Parastinê yê Medya, êrîş bi piştgiriya keşfên Emerîka didome. Ku hikûmeta AKP’ê tavîz û sozên dane Emerîka û Ewropa diponije, der barê operasyonên hewayî yên têkçûyî, di çapemeniya tirk de wêneyên operasyonê hatin nîşandan. Qaşo bi dîmenên berî operasyonê û piştî operasyonê, bi baregehên vala, hewl didin ku rayagiştî bixapînin.

Artêşa TC’ê, ku di sala 2007’an de li qadên bakurê Kurdistanê tengav bû, hewl dide bi êrîşên hewayî yên li dij başûr encamên siyasî bidest bixe. Lê rastiyek heye ku, di tevahiya sala 2007’an de serdestiya siyasî û derûnî di dest gerîla de bû. Digel ku artêş hemû hêza xwe bikaranî, encama ku dixwestin bi dest nexistin. Hem ji ber agirbesta ku berê hatibû îlankirin û hem jî ji ber hilbijartinan, ji hêla Tevgera Azadiyê ve ji hikûmeta heyî re ji bona çareseriyê firsend hate dayîn. Piştre zelal bû ku, AKP rewşa heyî û gavên ku hatine avêtin, bi tevahî li hember şerkirinê nirxande.

Bi van pêşketinên dawîn re, hikûmet û serfermandariya tirk zêdetir bi Emerîka ve hatin girêdan û gelek tavîzan dan Ewropa. Bi van tavîz û sozan pêşeroja Tirkiyê hate reşkirin û Tirkiyê li her welatê ku çûnê kirin mijara bazaran.

Daxuyaniyên serfermandariya tirk ên rojên dawîn, dîmenên bêhêzbûn û belangaziyê ne. Bahsa bi sedan şehadetên gerîlayên me tê kirin û tê îdeakirin ku ew qas di şikeftan de şehît ketine. Artêşa tirk û çapemeniya wê, pir zêde rewşê dinepixînin û hewl didin ku ji rewşa têkçûyîna derûnî xwe rizgar bikin. Beşek be jî bi van nûçeyên derewîn û li ser meseyan hatine amadekirinê re, xwe rihet bikin. Em wekî tevger, ji ber berpirsyariyên me yên li hember gel, her ku dema hevalek me şehîd dikeve, em ji gel re îlana hevalên xwe yên şehîd dikin. Vê yekê gelê me baş dizane. Serfermandariya tirk baştir dizane. Ev bombeyên ku wekî qazan têne binavkirin, wisa bandora wê encax li ser hedefên sabît û yên ku dixuyîn bandor dike. Bo nimûne dikare avahiyek û malek hûromûro bike. Bes ji ber ku avahî û bînayên gerîlayan nîn in, encax dikarin van bombeyan li dij ciyên sivîl bikarbînin û encam bigirin. Piştî bombeya qazanê diteqe, ger ku qad taht û kevir be, dibe ku ji ber parçeyên ku belav dibin birîndarî û şehadet pêk bên. Bes bi tevgereke rihet ku tu xwe bi erdê re bikî yek, bandora bombeyên qazan pir pir kêm dibe. Hele hele ku tu di şikeftên bi dehan metreyan ber bi hundirê tahtan de diçin de bî, tu bandora wê nîn e. Ku qazenek li nêzîk bikeve û tu xwe bi erdê re bikî yek, encax û encax di guhên mirov de giraniyek demkurt pêk bîne û cilên ku li ser mirov bin bipertîne. Zêdetir ne tiştek e.

Niha gerîlayên ku ev bi salane li çiyayê Kurdistanê têdikoşin, gerîlayên ku bi xwezayê re bûne yek û bûne parçeyek xwezayê, gerîlayên ku van bombeyan baş nas dikin gelek caran dîtine û ji nêz ve hîs kirine, ne mûmkûn e ku bi êrîşên bi vî rengî windahî bidin. Ji ber ku tecrûbeya dehan salan heye. Di operasyonên hewayî ku ev hefteyek zêdetir e didomin de, tenê 5 hevalên me li girekî hetanî dawîn bi çekên xwe yên giran li hember balafirên dijmin têkoşiyan û beşdarî karwanê şehîdan bûn. Roja duyemîn a operasyonê me ji gelê xwe re daxuyand û îlana hevalên xwe yên şehîd kirin. Ji bilî van şehadetan tu hevalek me şehîd neketiye.

Em baş dizanin ku gelê me ji ev cure propagandayan re ne xerîbin. Ev sî sal e, çapemeniya tirk û artêşa wê bi vî awayî gel dixapînin û bêyî ku cudahî têxin navbera leşkerên tirk û kurd ew dişînin mirinê. Ji salên 1984’an vir ve di vî şerî ku navek lê nehatiye kirin de, ku ji 50 hezarî zêdetir leşkerên artêşa tirk miribin û dewleta TC’ê hejmareke wekî 5 hezar bêje; gelek asayiye ku 5 gerîlayên me yên ku şehîd ketine ji sedî zêdetir nîşan bide. Ev bertekeke têkçûyîna derûnî ye. Ne tiştek e.

Li hember van êrîşan, pêwîst e destpêkê ciwanên me û gelê me xwepêşandan û çalakiyên xwe zêdetir bikin. Li hember ew Ewropaya ku bi dirûtî nêzîk dibe û li pey bincilkirina kuştina kurdan e, hewl dide rewşa heyî asayî nîşan bide. Emerîka rasterast li hember kurdan îlana şer kiriye. Ji ber vê yekê destpêkê gelê me yê Ewropayê, divê hemû kurd ev rewşa heyî teşîr bikin. Ji ber ku AKP li Kurdistanê li hember gelê kurd û Tevgera Azadiyê şerekî tevahî daye destpêkirin, divê rêveber û pêgirtiyên AKP’ê yên li Kurdistanê ji ber sûcên sîxurtî û xwefirotinê bêne cezakirin. Êdî şêweyê vê cezakirinê, Ciwanên Kurd ên Baz dikarin diyar bikin.