Roj derbas nabe ku genelkurmayê tirk jixweber daxuyaniya nede. Herî dawî bi îdeaya ku Emerîka çek dide PKK’ê, gotin di cî de be “qirakan” dan kenandin.

Ma qey wê ji we nepirsin ku hemû çekên we bi remza Emerîka hatine mohrkirin, ma hûn nîn in ku ji bona çek sendinan peymanan dikin?

Jixwe Rojhilata Navîn bûye depoya çekan, jixwe yên ku perê xwe dide dikare bistîne. Ma ne şert e ku înlehîn ên Emerîkayê bin. Di ser de kî gotiye ku çekên herî baş eydî Emerîkayê ne. Ma qey qumaşên hindî ye. Kurt kurmancî, kî pere bide, dikare her cure çek bistîne.

Ka em werin ser meseleya ku Emerîka çek daye an nedaye, jixwe heta niha nedaye, a rast ku dana jî wê xerab nebûya. Ji ber ku wê hatina hesabê belaş. Emerîka dibêje, me nedaye, rast jî dibêje, lê ev nayê vê wateyê ku, di peyasê de çekên Emerîkayê nayên firotin û nayên sendin. Kî bixwaze dikare bistîne. Kî pere bide ticarên Emerîka, çekên xwe digire. Ma hûn jî wisa nastînin? Di rastiyê de her çiqas teknolojiyên paşketîbin jî, carinan hîbeyî we jî dikin. Tabî ev li hesabê we tê. Ma çima hinekên din dikirin, dibe pirsgirêk?

Di vê navberê de çek dayîna rêveberiya federa ya Kurdistanê, hûn bizanibin ku ev rast e. Dîsa modernîzekirina tanqên Sedam û maşînên bi zirx, top û fûzeyan didin pêşmergeyan. Ku didin we, wê demê didin pêşmergeyan jî, ev rewşeke xwezayî ye, ne wisa?

Hûn baş bizanibin ku, PKK hemû çekên xwe bi pere distîne. Dixwazin hûn jî bistînin, ma ne bi pereyan e? Qey hûn gilî gazinc dikin, çima em ji we nastînin?

Ku cî hatiye pirsek min ji we heye; ew fûzeyên ku li trêna Çewlik-Dara Hênê, yê kê bûn? Ji Îranê diçûn ku derê? We çima der barê mijarê de qedexeya weşanê da? Hûn li ser karên qirêj hatin zevtkirin, ne wisa?

Di şûna ku hûn ji Emerîkayê re gotin dibêjin, pêşî li xwe binêrin. PKK we li ser karên sûc zevt kir, ne wisa? Piştre jî kî agahiyên îstîxbaratî daye dibêjin û tofanê radikin. Halbûkî ev trêna çendan e ku li wir tê qelibandin, bi rastî me jî hejmara wan ji bîr kir…

Ku li ser sînor çalakî çêbibin, wê çi derên çi derneyên. Jixwe di tilyafiroşî û qaçaxçîtiya mirov û çekan de ji we baştir kes nîn e. Vê dinya alem dizane. Êdî hemû kes dizane ku sûbayên we li ser sînor barkariyê dikin. Em jî baş dizanin, sûbayên we ji ber welatparêziyê van karan dikin.

Hûn di wan rûpelên xwe yên înternetê ku nivî şevê dixebitin, li ser van mijaran bisekinin wê baş bibe. Her hal hingî ku hûn serpêhatiyên hev rast dikin, ji we re dem namîne.

Hûn wekî genelkûrmay bi gelek karên vala re mijûl dibin û gelek vala diaxivin. Ji dilê mirov ev tê ku mirov bêje, hinek werin zelaliyê. Ji ber dîtina çekeke M-16, hûn dinyayê radikin ser piya. Ya hûn ên din bibînin wê çibibe? Ma înlehîn em nîşanî we bidin? Yên ku şer dikin helbet wê xwe bi çek bike, tê çi wateyê ku hûn dibejin çek sendin an dayîn?
A baş; hûn ev operasyona derveyî sînor ku du salên li ser zimanê we genî bûye bikin û werin hemû çekên me bibînin. Belkî bi vî awayî meraqa we bê cî. Tabî wê ev dîtina we ya ji nêzîk ve,wê ya dawîn be.
Neyse, jixwe we hemû dinyayê bi xwe daye kenandin, qene zêde nedin kenandin.