DEWLETA TIRK BI NÛÇEYÊN BEROVAJÎKIRINÊ, HEWL DIDE HEZÎMETA XWE YA LI ZAPÊ BIVEŞÊRE!
 

Ji rayagiştî û çapemeniyê re;

Di navbera rojên 20-29’ê sibatê de ji hêla artêşa tirk ve bi piştgiriya hêzên navneteweyî li qada Zapê ku li Herêmên Parastina Medya ye, operasyonek li dar ketibû. Di destpêka operasyonê de li hember berxwedanî û lehengiya gerîlayên me, piştî ku artêşa tirk lêdanên mezin xwar û kete rewşeke şerpeze, ji neçarî xwe ji qada Zapê vekişand.
Di şerên qewimî de, li gorî derfetên heyî, li hember propagandayên şerên taybet ên artêş û çapemeniya tirk, me gelê xwe ji pêşketinan agahdar kirin. Di dema şer de jî, ji nûçegihanên rojnameya Washinton Postê ku xwe gihandibûn qadên şer, berxwedaniya destanî ya gerîlayên me ji dinyayê re hate ragihandin. Piştre qenalên tv’yan jî li qadên ku di dest gerîlayên me de dîmen kişandin û hevpeyvînan kirin.

Li gorî nêzîkatiya me ya îdeolojîk û berpirsyariya me ya gel, em hemû hevalên xwe yên ku şehîd dikevin îlan dikin. Di nava şer de, di çarçoveya derfetan de ji bona gerîlayên me yên şehîd toren hatiye lidar xistin û li goristanên ku li qadên me ne hatine definkirin. Ev merasîmên ku li dar ketine, hem ji hêla me ve hatiye ragihandin hem jî ji hêla rojnemevanên serbixwe ve hatiye şopandin û li rayagiştî ya cîhanê hatiye belavkirin. Her çiqas digel kêm derfetan me hemû şehîdên xwe li alan nepêça be jî, ev berzbûna şehadetan tu carî kêm nake.

Çapemeniya tirk van dîmenan berevajî dike, hewl dide ku şerpezebûn û perîşaniya artêşê bincil bike û dema ku vê yekê dike jî, exlaqê çapemeniyê tune dihesibîne. Ev nûçeyên ku çapemeniya tirk dike, li dij exlaq û mirovantiyê ne. Di merasîma cenazeyên pênc hevalên me yên şehîd de, rojnameya Washington Post jî amede bû û şahidî kiriye.

Çapemeniya tirk goristana ku bi salane hevalên me yên şehîd lê tê definkirin, hemûyan wekî ku di operasyona Zapê de şehîd ketine nîşan dide. Hal ew e ku goristanên me ji gel re vekirîne û di şerên ku bi salane didome de ev goristan pêk hatine. Ev ji hêla gelê herêmê ve baş tê zanîn. Em hewl didin hevalên me yên ku di şerê ev 20 salî de şehîd ketine, di çarçoveya derfetan de li van goristanan bicivînin.

Divê gelê me vê baş bizanibe ku, me heta roja îroyîn şehîdên xwe ji rayagiştî veneşartiye. Em bang dikin ku rayagiştî bila werin li Herêmên Parastina Medya û rastiyan di cî de bibînin.